K O P I K O T H O K

             Kejaba ana kopi kothok, ana uga kopi sing aran kopi cong. Padha bahane nanging beda carane nggawe lan ya beda rasane. Kopi cong, kopi sing carane nggawe : gula,bubuk ing gelas dicongi  (dicuri)  banyu panas. Yen banyune panas temenan, isih mathuk, nanging yen banyu panas mau ing termos gek wis ora pati panas, lha iki sing bisa gawe kembunge weteng. Mulane aku ora wani ngopi ing sadhengah warung  sing durung takkenal. Iku jalaran wetengku wis kadhung nyandu karo sing jenenge kopi kothok.
             Kopi kothok ana ing warung-warung kopi dhaerahku, Kab.Bojonegoro.  Carane nggawe : gula lan bubuk diadoni banyu luwih dhisik ing wadhahe,lagi ing sateruse digodhog. Yen ing warung-warung, digodhog ing morong  (panci khusus godhogan wedang sing ana danganan  lan cucuke). Digodhog  nganti mumbul metu unthuke. Aja nganti unthuke pecah ambyar, awit yen unthuke pecah,ngurangi rasa enake. Cara panggodhoge kopi mengkono iku gawe rasane luwih mat awit antarane gula lan bubuk bisa lebur temenan kena panas. Mesthi wae bubuke ora mung saangger bubuk, nanging saka kopi kualitas becik. Adate, ing warung-warung kopi iku bubuke saka kopi gorengan dhewe. Utawa tuku bubuk saka tukang slep kopi sing ana ing njero pasar sing adate uga nyepaki kopi gorengan.

            Biyen,  warung-warung kopi  ing dhaerah Kab.Bojonegoro,wis mesthi kopi kothok sing diedol. Saiki, senajan isih akeh sing dodol kopi kothok, uga akeh sing kopi cong. Mulane, sing wis kadhung nyandu kopi kothok, warunge milih-milih golek endi sing kothok.
           Saka wis kadhung nyanduku kopi kothok kuwi, wiwit enom tekan seprene, kopiku takgawe dhewe.  Isih takcemplungi jae supaya tambah emate. Jaene takgeceg  dhisik, katut kegodhog, ya kareben mrasuk temenan rasa jaene. Kejaba luwih sip, jae ya ana kasiyate, kena kanggo tolak masuk angin. Alhamdulillah, aku arang keserang masuk angin senajan melek umbar-umbaran wiwit enom tekan tuwa, ngadhep mesin tulis, nulis-nulis. Ketunggon  kopi kothok, rokok klobot karemanku cukup, wis...,nulis-nulius-nulis tekan esuk, wis kulina. (Lagi setengah taun iki bisa tuku komputer rosokan, ngiras kena kanggo dolanan).-Ya merga ana rasa jaene sing pedhes  kuwi,  semut ya emoh nyedhak,njajal ndilat, kepedhesen antarane.Ya tambah aman, ora dirubung semut, batinku.
           Merga yen bengi arang turu, yen kopi kothokku entek, mangka isih butuh nulis-nulis, ya mangkat nggodhog kopi. Tangga-tanggaku ya wis apal, yen krungu swara dhag-dhog tengah wengi, ngerti yen aku lagi nggepuk jae ing meja. Kopi kothokkku pancen takgawe dhewe ,wegah kongkonan bojo. Kejaba kadhangkala ukuran gula-bubuke mleset,yen bojoku sing nggawe,sok kladuk klegen.Ngono wae isih nganggo  nggremeng merga rebyek. Ora kaya yen nggawe kopi cong, jarene, penak, kari ngecuri banyu panas.
           Lan karotengah taun kepungkur, Bonari Nabonenar,kanca Surabaya iku,menyang omahku taksugihi kopi kothok lan takkandhakake kopi kothok iku apa, awit saka pangiraku, bisa uga Bonari ora ngerti jalaran sakrunguku, ing kana-kana ora mesthi ana kopi kothok. Wangsulane, ing warung kana-kana, sangertine, ora  tau tumon. Mulih saka omahku muni yen njajal arep nggawe. Lha, kebacut ketagihan nganti seprene, jarene. Yen ora kothok, kurang mat. Bubuke nggawa saka Trenggalek,yen lagi tilik kluwargane.

          SENAJAN mung kopi, sepele katone, nanging tibake, bedane geni sing dienggo nggodhog, ya bisa ndadekake bedane rasane. Yen digodhog nganggo geni lenga patra ing kompor tradhisional ( minyak bumi, lenga sing kulina kanggo nguripake lampu) rasa wedange kaya mambu lenga patra. Apik sing yen digodhog nganggo geni kayu ing pawonan. Nanging isih kalah enak karo sing digodhog ing geni areng. Lan bakal luwih mat maneh yen digodhog nganggo geni blarak garing. Rasane, jan ngedap-edapi yen digodhog nganggo geni blarak garing, nganti biyen ing kutha Bojonegoro ana warung kopi khusus nganggo geni blarak. Blarake wis diuntili, sing wis dikira-kira gedhene untilane, saenteke geni blarak iku kopine wis mumbul. Nanging aku ora ngerti, apa sebabe nganggo geni blarak rasane luwih dene mat, apa merga blarak lan sada sing gilap iku kaya ngandhut (unsur) lenga?
         Dadi, sing aran geni iku, senajan genine padha, nanging merga saka bedane bahan sing gawe urupe geni, ya bisa seje rasane. Nyatane, geni elpiji ya luwih panas tinimbang  urupe geni saka bahan bakar liyane.[]