SAWO GLETHAK

ANA gendhing kuna tinggalane mbah-mbahe wong Jawa, kanthi irah-irahan (judhul) SAWO GLETHAK sing kanggo ing gendhing Tayub.Ana ukarane sing unine : re re re re re...sawo glethak, njenggelek bali maneh. Ukarane ora akeh ora akeh, mung dibolan-baleni , kaya gendhing dolanan sauni-unine. Malah bisa uga, sing nyuwara lan sing padha ngrungokake, akeh sing ora ngerti yen gendhing Sawo Glethak iku isi kawruh sing banget jero ngenani urip kanthi migunakake wit sawo kanggo pralambang (simbul utawa pasemon).

Wit sawo iku beda karo wit pelem,jembu,lsp. Wit pelem,jambu,tekan tuwa uwite isih panggah jejeg,kenceng mendhuwur. Yer wis sawo ora. Nalika cilik jejeg uwite, saya suwe, saya tuwa, dadi dhoyong uwite. Malah akeh sing dhoyonge kaya wis nemplek lemah nanging uwohe isih gembel,mbriyut.Wong urip ing sanyatane uga mengkono, saya gedhe, saya tuwa, awake ya dhoyong (bungkuk,ora jejeg). Nanging senajan wis tuwa, wis bungkuk,bisoa nduweni woh sing akeh kaya woh wit sawo iku mau. Woh sawo sing rasane legi enak, minangka pralambang, bisoa sing wis tuwa iku tetepa nduweni woh sing apik,sing migunani kanggone bebrayan, anak-putu lan buyut. Wohing wong urip ya NGAMALE, KAUTAMANE, KABECIKANE. Awit Kanjeng Nabi uga wis dhawuh : sing diarani wong becik iku,ya wong sing ana gunane kanggo liyan. (Yen kasugihane mung kanggo awake dhewe, arane ya durung becik uripe).Ing akhire wong urip, yen wis tuwa, suwe-suwe ya ora mung plek lemah kaya wit sawo tuwa,nanging ya bablas diurugi lemah.

Mulane, unine uikara ing gendhing :.....njenggelek bali maneh. Tegese, bali njenggelek urip ing kanane, ing alam langgeng ya papan dununging asal-usule. Apa sing bakal ditimbang ing kana ,ya uwite sawo iku, apa nalikane wit sawo iku urip, akeh wohe sing mupangati kanggo sesamaning urip?