PRAHARA
kapuk randhune rakyat
mabul-mabul ing ngawiyat.
(Minggon Kumandhang,Jakarta, 1972)
TANAH JAWA
lemah sacengkang kaya bis kakehan penumpang
sing ngadeg lan sing lungguh
kringete kaya diepuh
ungkepe, banget nyesakake napas
mentala sikut-sikutan lan tegel ngrampas.
(Minggon Kumandhang, Jakarta, 1972)
KUNJARAN
tlatah iki
kunjaran sepi
kunjarane Gusti
tan bisa disingkiri
kunjaran iki sepi
njerone bangsane maling-maling kuthuk
kapan kuruptor ngringkuk?
kunjaran iki sepi
awit bebener sarta keadilan
onya
blerengan gebyare mutiara.
(Dharma Kandha, Juli 1971)
PRAWAN
sadawane dalan aspalan
ngisor dhop lan neon
getih-getih prawan kececeran , ketaton
putihe mega
isih nglingkupi ndhuwur desa.
(Minggon Jaka Lodhang,Yogya, Mei 1975)
ROKOK
asep-asep putih
mertamu njero dhadha
ngulungake oleh-oleh
ing dluwang-dluwang burem dakseleh
asep-asep putih
pawewehmu ngebaki ati
balungan prosa lan puisi
yen sliramu ora mertamu
utegku njendhel, drijiku kaku.
(Majalah Jaya Baya, tgl 11 Pebruari 1973)
Cathetan tembung :
ngawiyat = nggegana ; awang-awang
diepuh = diperes
onya = ilang
balungan = bebakalan
